თანამედროვე ხელოვნების ტენდენციით შთაგონებული დიზაინი

მნიშვნელობა არ აქვს, ლოგოს ქმნი, ილუსტრაციას თუ პოსტერს, დიზაინზე მუშაობა საკმაოდ რთული და შრომატევადი პროცესია. ზოგჯერ, გადაღლილს, ალბათ, საქმისთვის თავიც კი მიგინებებია და ინსპირაციის საპოვნელად სხვა არტისტების ნამუშევრები დაგითვალიერებია. 

იმისათვის, რომ შთაგონების პოვნა სხვა დროს უფრო გაგიმარტივდეს, ამ ბლოგპოსტში რამდენიმე სახელოვნებო მიმართულებას მიმოვიხილავთ და ზოგიერთ ნამუშევარსაც გაგიზიარებთ.

ბაუჰაუსი

1919 წელს, გერმანიის ქალაქ ვაიმარში დაარსდა სახელოვნებო სკოლა – ბაუჰაუსი. ძალიან მალე, ბაუჰაუსის სტილი თანამედროვე დიზაინის, არქიტექტურისა და ხელოვნების ერთ-ერთ ყველაზე გავლენიან მიმდინარეობად გადაიქცა. ბაუჰაუსის მიზანი დიზაინიდან ყოველგვარი ზედმეტი ელემენტის “გაცხრილვა” და უკიდურესი, პრაქტიკული სიმარტივის შენარჩუნება იყო. ბაუჰაუსის ესთეტიკას წითლისა და შავის კომბინაცია, რთული ორნამენტების სიმცირე, მძაფრი სიმარტივე და გაბედულება განსაზღვრავდა.  

არტ-დეკო

არტ-დეკოს მიმდინარეობა დაიწყო ბაუჰაუსის პარალელურად, 1920-იან წლებში. დეკორაციული ხელოვნების ეს მოძრაობა მალე აისახა მოდასა და ვიზუალურ ხელოვნებაზე. ბაუჰაუსის მსგავსად, არტ-დეკოს მიმართულებაც გვიკარნახებდა, რომ სრულყოფილება მხოლოდ და მხოლოდ დეტალებშია. 

არტ-დეკოს წარმომადგენლები იყენებდნენ მკაცრ და სტატიკურ გეომეტრიულ წესებს. ერთ-ერთი ასეთი ხელოვანი იყო Cassandre, რომელიც ცნობილი გახდა ფრანგული მაღალი მოდის სახლის, Yves Saint Laurent-ის ლოგოს დიზაინით. მისი ერთ-ერთი პოსტერის, Pivolo-ს დიზაინი სწორედ არტ-დეკოს მიმდინარეობას ეკუთვნის.

დადაიზმი

დადაიზმი ევროპული ავანგარდის სახელოვნებო მიმართულებაა, რომელიც მეოცე საუკუნის დასაწყისში დაარსდა. ომის მოახლოება, არათვითკმარი ხელოვნება და ახალგაზრდული ამბოხი გახდა დადაიზმის ჩამოყალიბების საფუძველი. 

დადაისტებს სურდათ, არაფერი ჰქონოდათ საერთო წარსულ ტენდენციებთან, მათი მიზანი ძველის დანგრევა და სრულიად ახალი სახელოვნებო მიმართულების ჩამოყალიბება იყო. ალბათ, სწორედ ამიტომ ირეკლავდა ეს მოძრაობა სიბრაზეს, ნიჰილიზმსა და გულგატეხილობას.

დადაისტებმა გამოსახვის ახალ საშუალებებს მიმართეს: აბსტრაქციას, კოლაჟს, ტექსტის დანაწევრებას, მექანიკურ ხატვასა და შაბლონებს.

კუბიზმი

კუბიზმი მე-20 საუკუნის დასაწყისში წარმოიშვა, როგორც ავანგარდული ხელოვნების მიმდინარეობა, რომელმაც უდიდესი გავლენა მოახდინა ევროპულ მხატვრობასა და სკულპტურაში.

დადაიზმის მსგავსად, კუბიზმის მიზანი ხელოვნების ტრადიციულ ფორმებთან ბრძოლა იყო. კუბისტურ ნამუშევრებში ასახული აბსტრაქტული ფორმები, დაშლილი ობიექტები, ჩახლართული და ერთმანეთში არეული დეტალები მიზნად საგნის უფრო ღრმა კონტექსტში წარმოჩენას ისახავდა. სწორედ კუბიზმს ჰქონდა შესამჩნევი გავლენა ფუტურიზმისა და ექსპრესიონიზმის მიმდინარეობაზე. 

პოპ-არტი

პოპ-არტი მე-20 საუკუნის ვიზუალური ხელოვნების მიმდინარეობაა, რომელიც 1950-იან წლებში ბრიტანეთში წარმოიშვა, მოგვიანებით კი აშშ-ში განვითარდა. ამ მიმდინარეობისთვის დამახასიათებელი ტექნიკა ნაკარნახევია პოპულარული მასკულტურიდან, როგორიცაა რეკლამა და კომიქსები. პოპ-არტი ვიზუალურად გამოსახავდა ცნობილ ადამიანებს.

პოპ-არტის მიმდინარეობის ორი ცნობილი წარმომადგენელია როი ლიხტენშტეინი და ენდი უორჰოლი. 

ენდი უორჰოლის მიერ შექმნილმა ვარიაციებმა (მათ შორის, მერლინ მონროს პოლიქრომატულმა პორტრეტმა) გავლენა მოახდინა არა მხოლოდ ხელოვნებაზე, არამედ მოდის სამყაროზეც. 

როი ლიხტენშტეინი, განსხვავებით ენდი უორჰოლისგან, აქცენტს იმ ხელოვანებზე აკეთებდა, რომელსაც საზოგადოება უკვე იცნობდა, თუმცა აიგნორებდა.

როგორც ხედავ, ყოველი მიმდინარეობა თავისებურ გამოსახვის ტექნიკასა და საშუალებას პოულობდა. ზოგჯერ, ნამდვილად არ აქვს მნიშვნელობა, იდეას მოარგებ ვიზუალს თუ ვიზუალით წარმოშობ ახალ იდეას. არ შეგეშინდეს გამოწვევების, იყავი თავდაჯერებული და ეცადე, აუცილებლად შეავლო ხოლმე თვალი ვიზუალური ხელოვნების სხვადასხვა ნიმუშს. 

თუ დიზაინის პრინციპების ათვისება გინდა, თუმცა ჯერ არ იცი, როგორ, მაშინ ჩვენს გრაფიკული დიზაინის კურსზე დარეგისტრირდი.